news 10.10.2012

ใส่ความเห็น

ຫໍ​ປະຊຸມ​ແຫ່ງ​ຊາດກຽມພ້ອມ​ຮັບ​ໃຊ້​ກອງ​ປະຊຸມສຸ​ດຍອດ​ອາ​ເຊັມ 9

 

ລາວຮີບຮ້ອນຮ່າງກົດໝາຍ (ຂພສ) ເພື່ອນຳສະເໜີກອງປະຊຸມສະພາທ້າຍປີ 2012

* ລັດຖະບານລາວເລັ່ງຮ່າງກົດໝາຍວ່າດ້ວຍເສດຖະກິດພິເສດ ຮີບດ່ວນເພື່ອຈະນຳສະເໜີຕໍ່ກອງປະຊຸມສະໄໝສາມັນຂອງສະພາແຫ່ງຊາດໃນວາລະທ້າຍປີ 2012 ໃນການພິຈາ ລະນາ ແລະ ຮັບຮອງເອົາ, ຂະນະທີ່ຄະນະກຳມະການແຫ່ງຊາດເພື່ອຄຸ້ມຄອງເຂດເສດຖະກິດພິເສດ ແລະ ເຂດເສດຖະກິດສະເພາະເຫັນວ່າ ຖ້າກົດໝາຍສະບັບດັ່ງກ່າວຫາກ ຖືກຮັບຮອງ ແລະ ປະກາດໃຊ້ຢ່າງເປັນທາງການກໍຈະກາຍເປັນເຄື່ອງ ມືນິຕິກຳ ເພື່ອດຶງດູດການລົງທຶນ ແລະ ການພັດທະນາເຂດເສດຖະກິດພິເສດຢູ່ ສປປ ລາວ ໃຫ້ປາກົດເປັນ ຈິງ ແລະ ມີປະສິດທິຜົນປະກອບສ່ວນ ແລະ ກະຕຸກຊຸກຍູ້ການພັດທະນາເສດ-ສັງຄົມຂອງຊາດ.

ກອງປະຊຸມທາບທາມຮ່າງກົດໝາຍວ່າດ້ວຍເຂດເສດຖະກິດພິເສດໄດ້ໄຂຂຶ້ນໃນວັນທີ 9 ຕຸລາ 2012 ຢູ່ສູນຮວ່ມມືສາກົນລາວ-ຍີ່ປຸ່ນ ນະຄອນຫລວງວຽງຈັນ ໂດຍການເປັນປະ ທານຂອງທ່ານນາງ ບຸນເພັງ ມູນໂພໄຊ ກຳມະການສູນກາງພັກ, ລັດຖະມົນຕີປະຈຳຫ້ອງການວ່າການລັດຖະບານທັງເປັນຮອງປະທານ ຜູ້ປະຈຳການຄະນະກຳມະການແຫ່ງຊາດ ເພື່ອຄຸ້ມຄອງເຂດເສດຖະກິດພິເສດ ແລະ ເຂດເສດຖະກິດສະເພາະພ້ອມລັດຖະມົນຕີ, ຫົວໜ້າກົມ, ນັກຊ່ຽວຊານກົດໝາຍ, ຕາງໜ້າຈາກແຂວງພາກເໜືອ-ໃຕ້ ແລະ ພາກ ລັດ-ເອກະຊົນເຂົ້າຮ່ວມກວ່າ 200 ທ່ານ ຊຶ່ງກອງປະຊຸມນີ້ ໄດ້ເປີດໂອກາດໃຫ້ທຸກພາກສ່ວນ ສະແດງຄວາມຄິດຄວາມເຫັນ, ປຶກສາຫາລືແລກປ່ຽນປະສົບການ, ຄວາມຄົ້ນຄວ້າ, ເຈາະຈີ້ມບັນຫາຕ່າງໆໂດຍເລັ່ງໃສ່ເຮັດໃຫ້ກົດໝາຍ ສະບັບນີ້ມີເນື້ອໃນສົມບູນ ແລະ ຄົບຖ້ວນຂຶ້ນກວ່າເກົ່າ.ຈາກນັ້ນຈະໄດ້ຄັດຈ້ອນ ແລະ ລົງເລິກລາຍລະອຽດ ເພື່ອກຽມນຳສະ ເໜີຕໍ່ກອງປະຊຸມສະໄໝສາມັນຂອງສະພາແຫ່ງຊາດໃນວາລະທ້າຍປີ 2012.

ອີງຕາມແຜນການສ້າງ ແລະ ປັບປຸງກົດໝາຍໄລຍະ 5 ປີ ຂອງຄະນະປະຈຳສະພາແຫ່ງຊາດທີ່ໄດ້ກຳນົດໄວ້ວ່າ: ໃຫ້ກົດໝາຍວ່າດວ້ຍເຂດເສດຖະກິດພິເສດ ເປັນໜຶ່ງໃນຈຳນວນ ກົດໝາຍທີ່ຕ້ອງນຳສະເໜີຕໍ່ກອງປະຊຸມສະໄໝສາມັນຂອງສະພາແຫ່ງຊາດໃນວາລະທ້າຍປີ 2012 ນີ້.

ທ່ານນາງ ບຸນເພັງ ມູນໂພໄຊ ກຳມະການສູນກາງພັກ, ລັດຖະມົນຕີປະຈຳຫ້ອງການວ່າການລັດຖະບານ ທັງເປັນຮອງປະທານຜູ້ປະຈຳການຄະນະກຳມະການແຫ່ງຊາດ ເພື່ອຄຸ້ມຄອງ ເຂດເສດຖະກິດພິເສດ ແລະ ເຂດເສດຖະກິດສະເພາະກ່າວວ່າ: ການປະກອບຄຳເຫັນ, ປຶກສາຫາລືແລກປ່ຽນ, ຄົ້ນຄວ້າ ແລະ ຖອດຖອນບົດ ຮຽນຄັ້ງນີ້ເພື່ອປັບປຸງຮ່າງກົດ ໝາຍສະບັບດັ່ງກ່າວໃຫ້ມີເນື້ອໃນຄົບຖ້ວນ ແລະ ຮັດກຸມກວ່າເກົ່າ ຊຶ່ງກົດໝາຍ ນີ້ໄດ້ກຳນົດລະບຽບຄຸ້ມຄອງ ແລະພັດທະນາຮອບດ້ານທີ່ມີຄຸນລັກສະນະສະເພາະແຕກຕ່າງ ກັບກົດໝາຍອື່ນ ເພື່ອສົ່ງເສີມ ແລະ ດຶງດູດການລົງທຶນປະກອບສ່ວນພັດທະນາເສດຖະກິດ-ສັງຄົມແຫ່ງຊາດ ຕາມເນື້ອໃນ 4 ບຸກທະລຸຂອງພັກ ເຊື່ອມເຂົ້າກັບເສດຖະກິດ ຂອງພາກພື້ນ ແລະ ສາກົນຕາມກົນໄກຕະຫລາດທີ່ມີລັກສະນະ ສະເພາະຂອງປະເທດເຮົາໃນການເລີ່ມສ້າງໜໍ່ແໜງອຸດສາຫະກຳ ແລະ ທັນສະໄໝຄືເສັ້ນທາງເຮັດໃຫ້ປະເທດ ຫລຸດພົ້ນອອກຈາກຄວາມດ້ອຍພັດທະນາໃນປີ 2020.

ຜູ້ປະຈຳການຄະນະກຳມະການແຫ່ງຊາດເພື່ອຄຸ້ມຄອງເຂດເສດຖະກິດພິເສດ ແລະ ເຂດເສດຖະກິດ ສະເພາະຍັງກ່າວຕື່ມອີກວ່າ: ຫລາຍປະເທດໄດ້ຕີລາຄາວ່າການສ້າງເຂດເສດ ຖະກິດພິເສດ (ຂພສ) ແມ່ນວິທີດຶງດູດການລົງທຶນທີ່ດີອີກວິທີໜຶ່ງໂດຍສະເພາະປະເທດພວມພັດທະນາທີ່ມີງົບປະມານຈຳກັດ. ຕົວຢ່າງບົດລາຍງານຂອງທະນາຄານໂລກປີ 2010 ສະແດງໃຫ້ເຫັນວ່າ: ການພັດທະນາ ຂພສ ມີການຂະຫຍາຍຕົວໄວ ໃນໄລຍະ 20 ປີຜ່ານມາ ໃນນັ້ນນັບແຕ່ຊຸມປີ 1986 ຂພສ ມີພຽງແຕ່ 176 ເຂດໃນ 47 ປະເທດ ແຕ່ມາ ຮອດປັດຈຸບັນນີ້ ໄດ້ເພີ່ມຂຶ້ນເຖິງ 3. 000 ກວ່າແຫ່ງໃນ 130 ປະເທດທົ່ວໂລກ. ສະເພາະ ສປປ ລາວ ເຮົາເອງຮອດປັດຈຸບັນນີ້, ຂພສ ມີທັງໝົດ 10 ເຂດ ໃນນັ້ນເຂດເສດ ຖະກິດພິເສດ 2 ເຂດ ແລະ ເຂດເສດຖະກິດສະເພາະ 8 ເຂດ. ແນວໃດກໍດີຈຸດພິເສດຂອງຮ່າງກົດໝາຍວ່າດ້ວຍເຂດເສດຖະກິດພິເສດ ເປັນກົດໝາຍແຕກຕ່າງຈາກກົດໝາຍ ທົ່ວໄປເພາະມີຄຸນລັກສະນະພິເສດ ແລະ ສະເພາະຂອງມັນໂດຍຖືເອົາຄຳຂັວນ: (ກ້າຄິດ, ກ້າປະດິດສ້າງ, ກ້າຫັນເປັນລະບຽບກົດໝາຍ, ກ້າຈັດຕັ້ງປະຕິບັດ ແລະ ກ້າຮັບຜິດຊອບ ຈຶ່ງສາມາດບຸກທະລຸກົນໄກອຸດຕັນ ແລະ ບັນຫາຄົງຄ້າງທີ່ມີຢູ່ໃນປັດຈຸບັນ).

ເສດຖະກິດ-ສັງ​ຄົມ ພາຍ​ໃນ​ແຂວງ​ສະຫວັນ​ນະ​ເຂດ ​ຂະຫຍາຍຕົວ​ຢ່າງ​ຕໍ່​ເນື່ອງ

ใส่ความเห็น

ເສດຖະກິດ-ສັງ​ຄົມ ພາຍ​ໃນ​ແຂວງ​ສະຫວັນ​ນະ​ເຂດ ​ຂະຫຍາຍຕົວ​ຢ່າງ​ຕໍ່​ເນື່ອງ

(ຂປລ): ທ່ານ ດຣ ສົມ​ພັນ ​ແກ້ວ​ມີ​ໄຊ, ​ເຈົ້າ​ແຂວງ​ສະຫວັນ​ນະ​ເຂດ ​ໄດ້​ໃຫ້​ສຳ​ພາດ​ຕໍ່​ສື່​ມວນ​ຊົນ ​ໃນ​ຕອນ​ເຊົ້າ​ວັນ​ທີ 09 ຕຸລາ 2012 ທີ່​ຫ້ອງ​ວ່າການ​​ລັດຖະ​ບານ ກ່ຽວ​ກັບ​ການ ຈັດຕັ້ງຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່​ຄັ້ງທີ IX ຂອງ​ພັກ ​ກໍ​ຄື​ແຜນ​ພັດທະນາ​ເສດຖະກິດ-ສັງຄົມ​ແຫ່ງ​ຊາດ 5 ປີ ຄັ້ງທີ 7 ພາຍ​ໃນ​ແຂວງ​ສະຫວັນ​ນະ​ເຂດ ​ໂດຍ​ໄດ້​ສູ້​ຊົນ​ ຈັດຕັ້ງຜັນ​ຂະຫຍາຍ​ແຜນການ​ດັ່ງກ່າວ ​ໃນ​ສົກ​ປີ 2011-2012 ​ໂດຍ​ລວມ​ແລ້ວ​ແມ່ນ​ສາມາດ​ປະຕິບັດ​ໄດ້ຜົນ​ງານ​ຫລາຍ​ດ້ານ ​ເປັນຕົ້ນ​ເສດຖະກິດ​ມີ​ການ​ເຕີບ​ໂຕ ​ໃນ​ລະດັບ​ລື່ນ​ ແຜນການ 11%, ດ້ານ​ງົບປະມານ​ລື່ນ​ແຜນການ 10,5%, ອັດຕາ​ເງິນ​ເຟີ້ຢູ່​ໃນ​ລະດັບ 4,9 %, ການ​ລົງທຶນ​ຂອງ​ຕ່າງປະ​ເທດ​ແມ່ນ​ມີ​ຈຳນວນ​ເພີ່ມ​ຂຶ້ນ, ຂະ​ແໜງ​ກະສິກຳ​ເພີ່ມ​ຂຶ້ນ 7,3%, ອຸດສາຫະກຳ​ເພີ່ມ​ຂຶ້ນ 17,5% ​ແລະ ການ​ບໍລິການ​ເພີ່ມ​ຂຶ້ນ 16,5%, ອັດຕາ​ການ​ເຂົ້າ​ຮຽນ​ຂອງ​ເດັກ​ບັນລຸ 90 %, ປະຊາຊົນ​ຊົມ​ໃຊ້​ນ້ຳ​ສະອາດກວມ 98 % ຂອງ​ ຄອບຄົວ​ທັງ​ໝົດ, ອັດຕາ​ຊົມ​ໃຊ້​ວິດຖ່າຍກວມ 50%, ອັດຕາ​ການ​ຕາຍ​ຂອງ​ເດັກ​ອາຍຸ​ຕ່ຳ​ກວ່າ 1 ປີ ຫລຸດ​ລົງ 49​ຄົນ/1.000 ຄົນ. ຕົວ​ເລກ​ດັ່ງກ່າວ​ເປັນ​ໂຕ​ເລກ​ມະຫາ​ພາກ​ທີ່ ຢັ້ງຢືນ​ວ່າການຈັດຕັ້ງຜັນ​ຂະຫຍາຍ​ເສດຖະກິດ-ສັງຄົມ ຂອງ​ແຂວງ​ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ,

ສຳລັບ​ເຂດ​ເສດ​ຖະກິດ​ພິ​ເສດ ​ແມ່ນ​ໄດ້​ເອົາ​ໃຈ​ໃສ່​ຊຸກຍູ້​ສົ່ງ​ເສີມພາກ​ທຸລະ​ກິດທັງ​ພາຍ​ໃນ ​ແລະ ຕ່າງປະ​ເທດມາ​ລົງທຶນ​ຢູ່​ໃນ​ເຂດ ທີ່​ໄດ້​ສ້າງ​ພື້ນຖານ​ໂຄງ​ລ່າງ​ສຳ​ເລັດ​ແລ້ວນັ້ນ. ປະຈຸ​ ບັນມີ 25 ​ໂຮງງານ​ທີ່​ໄດ້​ເຊັນ​ສັນຍາ​ສ້າງຕັ້ງ​ໂຮງງານ​ຢູ່​ໃນ​ເຂດ​ດັ່ງກ່າວ ​ໃນ​ນັ້ນປະ​ກອບມີ ​ໂຮງງານ​ຜະລິດ​ແວ່ນຕາ ​(ຝຣັງ), ​ໂຮງງານ​ຜະລິດ ​ແລະ ປຸງ​ແຕ່​ກົ່ວ (ຍີ່ປຸ່ນ), ​ໂຮງງານ​ຜະລິດ​ ອາ​ໄຫລ​ເຄື່ອງບິນ​ໂບອິ້ງ 787 ​ແລະ ​ໂຮງງ​ານອື່ນໆ. ມີນັກທຸລະກິດບັນ ດາ​ປະ​ເທດ​ໃນ​ຂົງ​ເຂດ​ອາຊີ ​ແລະ ຢູ​ຣົບ ສົນ​ໃຈ​ຢາກ​ມາ​ລົງທຶນ​ຢູ່​ໃນ​ເຂດ​ເສດຖະກິດ​ພິ​ເສດ​ແຂວງ​ ສະ​ຫວັນນະ​ເຂດ ​ເປັນ​ຈຳນວນ​ຫລວງຫລາຍ ​ເນື່ອງ​ຈາກ​ວ່າ​ມີ​ຄວາມ​ສະ​ດວກ​ສະບາຍ​ໃນ​ການ​ຂົນ​ສົ່ງ, ການ​ຮັບປະກັນ​ຄວາມ​ສະຫງົບພາຍ​ໃນ​ແຂວງ, ​ເປັນ​​ເສັ້ນທາງ​ຜ່ານທາງ​ເລກ 9 ສູ່ເຂດ​ຕາ​ເວັນ​ອອກ​ໄປ​ທ່າ​ເຮືອ​ ຂອງ​ຫວຽດນາມ ​ແລະ ຜ່ານ​ຂົວ​ມິດຕະພາບ​ແຫ່ງ​ທີ 2 ຜ່ານ​ປະ​ເທດ​ໄທ​ໄປ​ສູ່​ເບື້ອງຕາ​ເວັນ​ຕົກ. ​ໃນ​ໄລຍະ​ຜ່ານ​ມາ​ເຫັນ​ວ່າ​ຕົວ​ເລກ​ການ​ລົງທຶນ​ແມ່ນ​ ມີ​ຈຳນວນ​ເພີ່ມ​ຂຶ້ນ. ສຳລັບ​ການທ່ອງທ່ຽວ​ຖື​ວ່າ ຈຳນວນ​ຄົນ​ຜ່ານ​ທາງ ​ແລະ ມາ​ທ່ອງ​ທ່ຽວ​​ເພີ່ມ​ຂຶ້​ນໃນ​ແຕ່ລະ​ປີ ​ແລະ ​ໃນ​ປີ 2012 ນີ້ຄາດ​ວ່າ​ຈະ​ມີ​ເຖິງ 1 ລ້ານ​ກວ່າ​ຄົນ.

ໃນ​ໂອກາດ​ດຽວ​ກັນ, ທ່ານ​ເຈົ້າ​ແຂວງ​ສະຫວັນ​ນະ​ເຂດ ຍັງ​ໄດ້​ໃຫ້​ຮູ້​ກ່ຽວ​ກັບການຈັດຕັ້ງຜັນ​ຂະຫຍາຍ​ມະຕິ 3 ຂອງ​ກົມ​ການ​ເມືອງ​ສູນ​ກາງ​ພັກ ​ໃນ​ການຈັດ​ຕັ້ງ​ປະຕິບັດ 3 ສ້າງ​ ຢູ່​ ພາຍ​ໃນ​ແຂວງ​ສະຫວັນ​ນະ​ເຂດ​, ຊຶ່ງ​ພາຍ​ຫລັງ​ທີ່​ສ້າງຕັ້ງຄະນະ​ກຳມະການ​ຊີ້ນຳ​ລະດັບ​ແຂວງ, ສ້າງຕັ້ງອະນຸ​ກຳມະການ​ຮັບຜິດຊອບ​ໃນ​ການ​ສ້າງ​ແຂວງ​ເປັນ​ຫົວໜ່ວຍ​ຍຸດ​ທະ​ສາດ, ສ້າງ​​ເມືອງ​ເປັນ​ຫົວໜ່ວຍ​ເຂັ້ມ​ແຂງ​ຮອບ​ດ້ານ ​ແລະ ສ້າງ​ບ້ານ​ເປັນ​ບ້ານ​ພັດທະນາ​ແລ້ວ ​ໄດ້​ຈັດຕັ້ງ​ເຮັດ​ທົດ​ລອງ​ຢູ່ 3 ​ເມືອງ​ຄື: ​ເມືອງ​ໄກສອນ ພົມວິຫານ, ​ເມືອງ​ຈຳ​ພອນ ​ແລະ ​ເມືອງ​ເຊ​ໂປ​ນ, ຊຶ່ງ​ກອງ​ເລຂາ ​ແລະ ອະນຸ​ກຳມະການ​ກຳລັງ​ລົງ​ສົມທົບ​ກັບ​ເມືອງ ​ເພື່ອ​ຈັດຕັ້ງປະຕິບັດ​ຕົວ​ຈິງ. ​ໃນ​ປະຈຸ​ບັນ​ແມ່ນ​ກຳລັງ​ເບິ່ງ​ຄືນ​ດ້ານ​ລະບຽບ​ກົດໝາຍ, ພາລະ​ບົດ ບາດ​ຂອງ​ອຳນາດ​ການ​ປົກຄອງ​ຂັ້ນ​ແຂວງ, ​ເມືອງ ​ແລະ ຂັ້ນບ້ານ ​ເພື່ອ​ປັບປຸງ​ໃຫ້​ສອດຄ່ອງ ​ແລະ ​ເໝາະ​ສົມ​ກັບ​ຕົວ​ຈິງ ​ເພື່ອ​ຫັນ​ໃຫ້​ເມືອງ​ມີ​ສິດ-ອຳນາດ​ຄຽງ​ຄູ່ກັບຄວາມ​ຮັບ ຜິດຊອບ​ຂອງ​ເຂົາ​ເຈົ້າ​ທີ່​ຈະ​ຕ້ອງ​ປະຕິບັດ​ຢູ່​ຂັ້ນຮາກ​ຖານ.

ພິທີຊັກທຸງ ເນື່ອງໃນໂອກາດສະເຫລີມສະຫລອງວັນຄົບຮອບ 45 ປີ ແຫ່ງການສ້າງຕັ້ງອາຊຽນ ແລະ 15 ປີ ທີ່ ສປປ ລາວ ເຂົ້າ ອາຊຽນ

ใส่ความเห็น

ພິທີຊັກທຸງ ເນື່ອງໃນໂອກາດສະເຫລີມສະຫລອງວັນຄົບຮອບ 45 ປີ

ແຫ່ງການສ້າງຕັ້ງອາຊຽນ ແລະ 15 ປີ ທີ່ ສປປ ລາວ ເຂົ້າ ອາຊຽນ

ວັນທີ ສິງຫາ 2012

ເວລາ 10:00 ໂມງ ທີ່ ກະຊວງການຕ່າງປະເທດ

———————————————————————————–

IMG 4392 - Copy

ໃນຕອນເຊົ້າຂອງວັນທີ 7 ສິງຫາ 2012 ທີ່ ກະຊວງການຕ່າງປະເທດ, ທ່ານ ອາລຸນແກ້ວ ກິດຕິຄຸນ, ລັດຖະມົນຕີຊ່ວຍວ່າການ ກະຊວງການຕ່າງປະເທດ ໄດ້ກ່າວເປີດພິທີຊັກທຸງຊາດລາວ ແລະ ທຸງອາຊຽນຂຶ້ນເສົາ ເນື່ອງໃນໂອກາດສະເຫລີມສະຫລອງວັນຄົບຮອບ 45 ປີ ແຫ່ງການສ້າງຕັ້ງອາຊຽນ ຊຶ່ງປີນີ້ກໍ່ເປັນປີພິເສດ ເພາະອາຊຽນຄົບຮອບ 45 ປີ ແລະຄົບຮອບ 15ທີ່ ສປປ ລາວ ເຂົ້າເປັນສະມາຊິກອາຊຽນ. ໃນພິທີດັ່ງ ກ່າວ, ໄດ້ມີການບັນເລງເພງຊາດລາວ ແລະ ເພງອາຊຽນ (The ASEAN Way) ໂດຍກອງດຸລິຍາງແຫ່ງຊາດ ຂອງ ສປປ ລາວ.

DSC 0080

ໃຫ້ກຽດເຂົ້າຮ່ວມພິທີຊັກທຸງຄັ້ງນີ້ ມີທ່ານ ດຣ. ທອງລຸນ ສີສຸລິດ,ຮອງນາຍົກລັດຖະມົນຕີ, ລັດຖະ ມົນຕີວ່າການ ກະຊວງການຕ່າງປະເທດ,ບັນດາລັດຖະມົນຕີວ່າການຂອງກະຊວງຮັບຜິດຊອບ 3 ເສົາຄ້ຳປະ ຊາຄົມອາຊຽນຄື:ກະຊວງການຕ່າງປະເທດ (ປະຊາຄົມການເມືອງ-ຄວາມໝັ້ນຄົງ), ກະຊວງອຸດສະຫະກຳ ແລະ ການຄ້າ (ປະຊາຄົມເສດຖະກິດ), ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ(ປະຊາຄົມວັດທະນະທຳ-ສັງຄົມ), ພ້ອມດ້ວຍບັນດາລັດຖະມົນຕີຊ່ວຍວ່າການ. ນອກນີ້,ຍັງມີບັນດາຜູ້ຕາງໜ້າຈຸດປະສານງານອາຊຽນຂອງແຕ່ລະຂະແໜງການ       ກ່ຽວຂ້ອງຂອງ ສປປ ລາວ ແລະ ບັນດາເອກອັກຄະລັດຖະທູດ ຈາກ ປະເທສະມາຊິກອາຊຽນ.

ການເຕົ້າໂຮມກັນ ເພື່ອເປີດພິທີຊັກທຸງຂຶ້ນເສົານີ້ ເປັນກິດຈະກຳໜຶ່ງ ທີ່ມີຄວາມສຳຄັນ ສຳລັບ ສປປ ລາວ ກໍ່ຄື ບັນດາປະເທດສະມາຊິກອາຊຽນ ຊຶ່ງໃນປີນີ້ ແຕ່ລະປະເທດສະມາຊິກອາຊຽນ ໄດ້ຈັດພິທີດັ່ງກ່າວຂຶ້ນ ເພື່ອສົ່ງເສີມການປູກຈິດສຳນຶກ ແລະ ຄວາມເຂົ້າໃຈກ່ຽວກັບອາຊຽນ ຊຶ່ງມີເປົ້າໝາຍສ້າງຕັ້ງປະຊາຄົມອາຊຽນໃນປີ 2015. ທຸງອາຊຽນ ແມ່ນເປັນສັນຍາລັກ ທີ່ສະແດງເຖິງ ສັນຕິພາບ, ສະຖຽນລະພາບ, ຄວາມສາມັກຄີ ແລະ ຄວາມເຂັ້ມແຂງຂອງອາຊຽນ.

news

ใส่ความเห็น

ບົດປາໄສ

ໂດຍ ພະນະທ່ານ ດຣ. ທອງລຸນ ສີສຸລິດ, ຮອງນາຍົກລັດຖະມົນຕີ,

ລັດຖະມົນຕີວ່າການ ກະຊວງການຕ່າງປະເທດ ແຫ່ງ ສປປ ລາວ

ຕໍ່ ກອງປະຊຸມສະມັດຊາໃຫຍ່ ອົງການສະຫະປະຊາຊາດ ຄັ້ງທີ 67,

ນິວຢອກ, 28 ກັນຍາ 2012

——————————————————

h.e thongloun sisoulith

ທ່ານ ປະທານ,

ກ່ອນອື່ນໝົດ ຂ້າພະເຈົ້າ ຂໍສະແດງຄວາມຊົມເຊີຍຢ່າງຈິງໃຈ ມາຍັງພະນະທ່ານ ວຸກ ເຈເຣມິກ (Mr. Vuk Jeremic), ທີ່ໄດ້ຮັບເລືອກຕັ້ງໃຫ້ດຳລົງຕຳແໜ່ງ ເປັນປະທານກອງ ປະຊຸມສະມັດຊາໃຫຍ່ ສປຊ ຄັ້ງທີ່ 67 ນີ້. ຂ້າພະເຈົ້າ ມີຄວາມເຊື່ອໝັ້ນວ່າ ດ້ວຍບົດຮຽນອັນ ກວ້າງຂວາງ ແລະ ແນວຄິດລິເລີ້ມທີ່ສ້າງສັນຕ່າງໆຂອງທ່ານ, ທ່ານຈະສາມາດນຳພາວຽກງານ ຂອງ ອົງການສະຫະປະຊາຊາດ ໃຫ້ບັນລຸຈຸດປະສົງຄາດໝາຍ ແລະ ເຮັດໃຫ້ອົງການສະຫະ ປະຊາຊາດຮັບໃຊ້ຜົນປະໂຫຍດລວມ ຂອງປະເທດສະມາຊິກທັງໝົດ. ພວກຂ້າພະເຈົ້າພ້ອມ ແລ້ວທີ່ຈະ ໃຫ້ການຮ່ວມມື ແລະ ສະໜັບສະໜູນຢ່າງເຕັມ ສ່ວນແກ່ການປະຕິບັດໜ້າທີ່ອັນ ສູງສົ່ງ ແລະ ມີກຽດດັ່ງກ່າວນີ້ຂອງທ່ານ.

ພ້ອມດຽວກັນນີ້, ຂ້າພະເຈົ້າ ກໍ່ຂໍສະແດງຄວາມຊົມເຊີຍ ມາຍັງພະນະທ່ານ ນາເຊຍ ອັບດູລາສິດ ອານນາເຊີ (Nassir Abdulaziz AlNasser), ປະທານກອງປະຊຸມ ສະມັດຊາໃຫຍ່ ສປຊ ຄັ້ງທີ່ 66 ທີ່ໄດ້ປະຕິບັດໜ້າທີ່ຂອງ ຕົນດ້ວຍຜົນສຳເລັດອັນຈົບງາມ.

ຂ້າພະເຈົ້າ ຂໍສະແດງຄວາມຊົມເຊີຍ ຕໍ່ຄວາມພະຍາຍາມ ຂອງ ພະນະທ່ານ ບານ ກີມູນ, ເລຂາທິການໃຫຍ່ ສປຊ ໃນການປະຕິບັດໜ້າທີ່ຂອງຕົນຢ່າງຕັ້ງໜ້າ ແລະ ບໍຮູ້ອິດຮູ້ເມື່ອຍ ເພື່ອພາລະກິດ ແລະ ເປົ້າໝາຍຂອງອົງການ ສະຫະປະຊາຊາດ ໃນສະພາບຂອງໂລກທີ່ມີຄວາມສັບສົນ, ລວມທັງຄວາມພະຍາຍາມຂອງທ່ານ ໃນການປັບ ປຸງແບບແຜນວິທີເຮັດວຽກ ຂອງອົງການສະຫະປະຊາຊາດ ໂດຍ ລວມ ແລະ ໂດຍສະເພາະ ກອງເລຂາສະຫະປະຊາຊາດ ແນໃສ່ເຮັດໃຫ້ອົງການດັ່ງກ່າວ ມີປະສິດ ທິພາບຍິ່ງໆຂຶ້ນ.

ທ່ານ ປະທານ,

ໃນໄລຍະ 2 ປີ ທີ່ຜ່ານມານີ້, ວົງຄະນະຍາດສາກົນໄດ້ປະເຊີນກັບຄວາມສັບສົນວຸ້ນວາຍ ຫລາຍປະການທີ່ເກີດຂຶ້ນຢ່າງເນື່ອງ ນິດລຽນຕິດບໍ່ວ່າໃນຂົງເຂດການເມືອງ ແລະ ຄວາມໝັ້ນ ຄົງ, ເສດຖະກິດສັງຄົມ. ຄວາມສັບສົນ ແລະ ວຸ້ນວາຍດ້ານການເມືອງໃນ ລະດັບພາກພື້ນໂດຍ ສະເພາະໃນຕາເວັນອອກກາງທີ່ແກ່ຍາວມາເຖິງປັດຈຸບັນຍັງ ບໍ່ທັນມີສັນ ຍານທີ່ຈະສາມາດຊອກ ຊ່ອງທາງແກ້ໄຂໃຫ້ສຳເລັດໂດຍໄວໄດ້. ການນໍາໃຊ້ຄວາມຮຸນແຮງໃນ ທຸກຮູບແບບເຊັ່ນ: ການໂຈມຕີສໍານັກງານການທູດຢູ່ປະເທດລີບີ ແມ່ນສິ່ງທີ່ພວກເຮົາບໍ່ ສາມາດຮັບໄດ້. ວິກິດການດ້ານເສດຖະກິດ ແລະ ການເງິນທີ່ເກີດຂຶ້ນ ແລະ ແພ່ລາມໄປທົ່ວໂລກນັ້ນ ໄດ້ກ້າວເຂົ້າມາສູ່ຈຸດສູງອັນໄດ້ສ້າງຄວາມວິຕົກກັງວົນໃຫ້ທຸກປະເທດ ໃນໂລກແມ່ກະທັ້ງແຕ່ສະຫະ ພາບເອີຣົບທີ່ເປັນກຸ່ມເສດຖະກິດທີ່ມີຄວາມເຂັ້ມແຂງໃນໂລກ. ວິກິດການຕ່າງໆທີ່ເກີດຂື້ນມານີ້ ເປັນສິ່ງທ້າທາຍຕໍ່ຄວາມສາມາດ ແລະ ຄວາມເຊື່ອໝັ້ນຂອງ ກົນໄກການແກ້ໄຂຕ່າງໆທີ່ວົງຄະນະຍາດສາກົນໄດ້ສ້າງຂຶ້ນມາ ເພື່ອຮັບມືກັບສິ່ງທ້າທາຍທີ່ ເກີດຂຶ້ນຢູ່ໃນໂລກ. ອັນນີ້ໄດ້ສະແດງອອກໃຫ້ພວກເຮົາເຫັນຢ່າງຈະແຈ້ງ ແລ້ວວ່າຄວາມຕັດ ສິນໃຈໃນການປະຕິບັດຮ່ວມກັນຂອງພວກເຮົາຍັງບໍ່ທັນໄດ້ຮັບຜົນເທົ່າທີ່ຄວນເຊັ່ນ: ການເຈ ລະຈາກ່ຽວກັບເງື່ອນໄຂ ແລະ ພັນທະໃນການແກ້ໄຂບັນຫາການປ່ຽນແປງດິນຟ້າອາກາດຍັງ ບໍ່ທັນມີຄວາມຄືບໜ້າທັ້ງໆທີ່ ອານຸສັນຍາກຽວໂຕວ່າດ້ວຍການປ່ຽນແປງດິນຟ້າອາກາດຈະ ສິ້ນສຸດ ໃນປີ 2012 ນີ້, ຄວາມພະຍາຍາມໃນການສ້າງ ສົນທິສັນຍາວ່າດ້ວຍການ ຄ້າອາວຸດເຊິ່ງເລີ້ມຕົ້ນມາໄດ້ຫລາຍປີແລ້ວປະເຊີນກັບຄວາມລົ້ມເຫລວ ,ຄວາມຕັດສິນໃຈຂອງ ປະເທດພັດທະນາແລ້ວໃນການໃຫ້ການຊ່ວຍເຫລືອແກ່ປະເທດດ້ອຍໂອກາດ ໂດຍສະເພາະປະ ເທດດ້ອຍພັດທະນາ, ປະເທດກຳລັງພັດທະນາທີ່ບໍ່ມີຊາຍແດນຕິດທະເລ ແລະ ປະເທດກຳ ລັງພັດທະນາເກາະດອນນ້ອຍນັ້ນ ແມ່ນນັບມື້ນັບຫລຸດໜ້ອຍຖອຍລົງ. ຕໍ່ໜ້າສະພາບການ ດັ່ງກ່າວນີ້, ອົງການສະຫະປະຊາຊາດ, ເຊິ່ງເປັນອົງການຈັກກະວານດຽວໃນໂລກທີ່ມີສະມາຊິກ ຫລາຍທີ່ສຸດ, ເປັນອົງການທີ່ມີກົນໄກການປະຕິບັດວຽກງານທີ່ສາມາດເຊື່ອຖືໄດ້ນັ້ນ, ຄວນເພີ້ມ ທະວີຄວາມເຂັ້ມແຂງ, ຄວາມສັກສິດໃນການແກ້ໄຂບັນຫາສໍາຄັນຂອງໂລກໃຫ້ໄດ້. ການທີ່ ຈະເຮັດໃຫ້ອົງການສະຫະປະຊາຊາດມີຄວາມເຂັ້ມແຂງ ແລະ ມີບົດບາດຫລາຍຂຶ້ນນັ້ນ, ແມ່ນຂຶ້ນກັບປະເທດສະມາຊິກພວກເຮົາທັງໝົດ. ປະເທດສະມາຊິກ ສປຊ ຄວນໃຫ້ການຮ່ວມ ມືຢ່າງເຕັມສ່ວນ, ຄວນຊັ່ງຊາຜົນປະໂຫຍດແຫ່ງຊາດກັບພັນທະສາກົນ ໃຫ້ເຫມາະສົມກົມ ກຽວເພື່ອການແກ້ໄຂບັນຫາກວມໂລກຢ່າງມີປະສິດ ທິຜົນ ແລະ ທັນການ.

ທ່ານປະທານ,

ໃນສະພາບການປັດຈຸບັນນີ້ ອົງການຈັດຕັ້ງພາກພື້ນແມ່ນມີບົດບາດສຳຄັນ ຍັງໃນການ ແກ້ໄຂບັນຫາກວມໂລກ ໄປໃນຕົວຂອງມັນ. ຫລາຍປະເທດໃນໂລກ ໄດ້ໃຫ້ຄວາມສຳຄັນຕໍ່ ການຈັດຕັ້ງ, ກົນໄກ ແລະ ການເຄື່ອນໄຫວຢ່າງຫ້າວຫັນຂອງອາຊຽນ ກໍ່ຄືຂອບການ ຮ່ວມມື ແລະ ຂໍ້ລິເລີ່ມຕ່າງໆຂອງອາຊຽນທີ່ນັບມື້ນັບໄດ້ຮັບການຂະຫຍາຍຕົວອອກຢ່າງ ກວ້າງຂວາງ. ປັດຈຸບັນ ອາຊຽນໄດ້ກ້າວເຂົ້າສູ່ໄລຍະສຳຄັນ ເປັນຕົ້ນແມ່ນການຈັດ ຕັ້ງຜັນຂະຫຍາຍຄຳໝັ້ນ ສັນຍາຂອງ ບັນດາຜູ້ນໍາ ກ່ຽວກັບ ການສ້າງຕັ້ງປະຊາຄົມອາຊຽນ ທີ່ປະກອບດ້ວຍ 3 ເສົາຄໍ້າ: ປະຊາຄົມການເມືອງ ແລະ ຄວາມໝັ້ນຄົງ, ປະຊາຄົມເສດຖະກິດ ແລະ ປະຊາຄົມວັດທະນາ ທຳສັງຄົມ ໃນປີ 2015.  ດ້ວຍການນໍາ ໃຊ້ທ່າແຮງພາຍໃນ ບວກກັບ ການສະໜັບສະໜູນ ຈາກພາຍນອກ ໂດຍສະເພາະຈາກ ປະເທດຄູ່ເຈລະຈາ, ພວກຂ້າພະເຈົ້າເຊື່ອໝັ້ນວ່າ ອາຊຽນ ຈະສາມາດ ບັນລຸເປົ້າໝາຍ ອັນສູງສົ່ງຂອງຕົນ ໃນການສ້າງອາຊຽນໃຫ້ກາຍເປັນປະຊາຄົມ ທີ່ມີສະຖຽນລະພາບທາງ ດ້ານການເມືອງ, ມີການເຊື່ອມໂຍງທາງດ້ານເສດຖະກິດ ແລະ ມີຄວາມ ກົມກຽວທາງ ວັດທະນະທໍາສັງຄົມ ອັນຈະເປັນການປະກອບສ່ວນ ເຂົ້າໃນພາລະກິດແຫ່ງການ ປົກປັກຮັກ ສາສັນຕິພາບ ແລະ ສົ່ງເສີມຄວາມກ້າວໜ້າສີວິໄລ ໃນພາກພື້ນ ແລະ ໃນໂລກ.

ທ່ານ ປະທານ,

ໃນຖານະທີ່ເປັນສະມາຊິກ ຂອງວົງຄະນະຍາດສາກົນ, ສປປລາວ ໄດ້ມີຄວາມພະຍາຍາມ ຕັ້ງຫນ້າ ປະຕິບັດ ພັນທະສາກົນຂອງຕົນຢ່າງເອົາໃຈໃສ່, ໂດຍໄດ້ສືບຕໍ່ດຳເນີນນະໂຍ ບາຍການຮ່ວມມືກັບສາກົນແບບເປີດກວ້າງ ບົນພື້ນຖານຄວາມສະໝີພາບ ແລະ ຕ່າງຝ່າຍຕ່າງມີຜົນປະໂຫຍດ, ນັບຖືຄວາມເປັນເອກະລາດແຫ່ງຊາດ, ອະທິປະໄຕ ແລະ ບໍ່ແຊກແຊງກິດຈະການພາຍໃນຂອງກັນ ແລະ ກັນ ເພື່ອສ້າງສະພາບແວດລ້ອມສາກົນ ທີ່ອໍານວຍ ໃຫ້ແກ່ການພັດທະນາ ປະເທດຊາດ. ໃນປີທີ່ຜ່ານມາ, ເຖິງວ່າ ຈະປະເຊີນກັບ ສິ່ງທ້າທາຍຫລາຍດ້ານກໍ່ຕາມ, ແຕ່ ສປປ ລາວ ກໍຍັງສືບຕໍ່ມີສະຖຽນລະພາບທາງການ ເມືອງ, ຄວາມເປັນລະບຽບຮຽບຮ້ອຍທາງສັງຄົມ, ເສດຖະກິດແຫ່ງຊາດ ຍັງໄດ້ຮັບການ ພັດທະນາຢ່າງຕໍ່ເນື່ອງ, ຈັງຫວະການເຕີບໂຕທາງດ້ານເສດຖະກິດສະເລັ່ຍໄດ້ 8% ຕໍ່ປີ, ການລົງທຶນໂດຍກົງຈາກຕ່າງປະເທດໄດ້ສືບຕໍ່ເພີ່ມຂຶ້ນກວ່າ 30%, ການແກ້ໄຂຄວາມທຸກ ຍາກຂອງປະຊາຊົນ ບັນລຸໄດ້ຕາມ ຄາດຫມາຍທີ່ວາງໄວ້ໃນແຜນການ 5 ປີ ອັນເຮັດໃຫ້ ຊິວິດການເປັນຢູ່ຂອງປະຊາຊົນ ໄດ້ຮັບການປັບປຸງໃຫ້ດີຂຶ້ນ ເທື່ອລະກ້າວ. ທັງໝົດນັ້ນ ເປັນການສ້າງເງື່ອນໄຂທີ່ເອື້ອອໍານວຍໃຫ້ແກ່ການບັນລຸເປົ້າໝາຍສະຫັດສະຫວັດ ດ້ານ ການພັດທະນາ ໃນປີ 2015, ສ້າງປະຖົມປັດໃຈ ແລະ ພື້ນຖານວັດຖຸເຕັກນິກທີ່ຈຳເປັນ ເພື່ອນຳເອົາປະເທດຊາດ ໃຫ້ຫລຸດພົ້ນອອກຈາກ ສະຖານະພາບດ້ອຍພັດທະນາໃນປີ 2020.ໄປຄຽງຄູ່ກັບຜົນສຳເລັດດັ່ງກ່າວ, ສປປລາວ ກໍຍັງສືບຕໍ່ປະເຊີນກັບອຸປະສັກ ແລະ ສິ່ງ ທ້າທາຍຫລາຍດ້ານ ນອກຈາກຜົນກະທົບ ຈາກວິກິດການເສດຖະກິດຂອງໂລກ ແລະ ພາກພື້ນກໍ່ຄື, ຜົນຮ້າຍຈາກໄພທໍາມະຊາດແລ້ວ ລະເບີດບໍ່ທັນແຕກທີ່ຕົກຄ້າງຈາກປາງ ສົງຄາມ ຍັງສືບຕໍ່ເປັນໄພຂົ່ມຂູ່ຕໍ່ຊີວິດຂອງພົນລະເຮືອນ ທັງເປັນຜົນກະທົບ ສືບເນື່ອງ ຕໍ່ການພັດທະນາເສດຖະກິດ-ສັງຄົມຂອງປະເທດ ລວມທັງ ຕໍ່ການບັນລຸເປົ້າຫມາຍ ສະຫັດສະຫວັດ (MDGs) ຂອງ ສປປລາວ. ສະນັ້ນ, ລັດຖະບານລາວ ຮຽກຮ້ອງມາຍັງ ບັນດາປະເທດຕ່າງໆໃນໂລກ ເຂົ້າເປັນພາຄີຂອງສົນທິສັນຍາໂອສະໂລ ວ່າດ້ວຍລະເບີດລູກ ຫວ່ານ ແນໃສ່ຈໍາກັດ ແລະ ລົບລ້າງການນໍາໃຊ້ລະເບີດດັ່ງກ່າວໃນໂລກນີ້ໃຫ້ໝົດໄປ. ຕໍ່ໜ້າສະພາບການດັ່ງກ່າວ, ລັດຖະບານ ສປປລາວ ຈະສືບຕໍ່ນໍາພາປະຊາຊົນຂອງຕົນ ປະຕິບັດຄວາມມຸ້ງຫມັ້ນທາງການເມືອງທີ່ໄດ້ວາງໄວ້ ເພື່ອການພັດທະນາແບບຍືນຍົງ ແລະ ບັນລຸເປົ້າຫມາຍນໍາເອົາ ປະເທດຊາດ ຫລຸດພົ້ນອອກຈາກສະພາບດ້ອຍພັດທະນາ ໃນປີ 2020. ໃນໂອກາດອັນສະຫງ່າລາສີນີ້ ແລະ ໃນເວທີອັນສໍາຄັນຍິ່ງນີ້ ສປປລາວ ຂໍສະແດງຄວາມຂອບໃຈ ແລະ ຮູ້ບຸນຄຸນຕໍ່ວົງຄະນາຍາດສາກົນ ທີ່ໄດ້ໃຫ້ການສະຫນັບ ສະຫນູນຊ່ວຍເຫລືອອັນລໍ້າຄ່າ ແລະ ມີປະສິດທິຜົນ ຕໍ່ສປປລາວ ແລະ ຫວັງຢ່າງຍິ່ງວ່າ ຈະສືບຕໍ່ໄດ້ຮັບ ການສະຫນັບສະຫນູນ ແລະ ຊ່ວຍເຫລືອຕໍ່ໄປອີກ.

ທ່ານປະທານ,

ສປປລາວ ມີຄວາມປິຕິເປັນຢ່າງຍິນດີຍິ່ງ ທີ່ໄດ້ຮັບກຽດອັນສູງສົ່ງໃຫ້ເປັນເຈົ້າພາບ ຈັດກອງປະຊຸມສຸດຍອດ ຂອງບັນດາຜູ້ນໍາອາຊີ-ເອີຣົບ (ຫລື ອາເຊັມ) ຄັ້ງທີ 9  ທີ່ຈະຈັດຂຶ້ນ ໃນວັນທີ 5-6 ພະຈິກ 2012 ທີ່ວຽງຈັນ, ນະຄອນຫລວງ ຂອງ ສປປລາວ. ອັນນີ້ຈະເປັນໂອກາດໃຫ້ຜູ້ນໍາຂອງສອງພາກພື້ນ ໄດ້ປຶກສາຫາລື ແລກປ່ຽນຄໍາເຫັນເຊິ່ງ ກັນ ແລະ ກັນ. ປະຈຸບັນ, ລັດຖະບານ ສປປລາວ ມີຄວາມກຽມພ້ອມທຸກດ້ານແລ້ວ ສຳລັບ ການເປັນເຈົ້າພາບກອງປະຊຸມສຸດຍອດດັ່ງກ່າວ. ລັດຖະບານ ແລະ ປະຊາຊົນລາວ ມີຄວາມຍິນດີເປັນຢ່າງຍິ່ງ ທີ່ຈະ ມີໂອກາດໄດ້ຕ້ອນຮັບຜູ້ແທນລະດັບສູງຈາກ 51 ຄະນະ ຈາກອາຊີ ແລະ ເອີຣົບ.

ທ່ານ ປະທານ,

ວົງຄະນາຍາດສາກົນ ຄົງຈະຢາກເຫັນການແກ້ໄຂບັນຫາສັນຕິພາບ ແລະ ຄວາມຫມັ້ນຄົງ ຢູ່ໃນຕາເວັນອອກກາງ. ການປະທະກັນຢູ່ພາກພື້ນນີ້ ບໍ່ພຽງແຕ່ບໍ່ສາມາດຢຸດຕິລົງໄດ້ ເທົ່ານັ້ນ, ແຕ່ຍັງບານປາຍອອກໄປເລື້ອຍໆ. ບັນຫາຄວາມຂັດແຍ່ງ ລະຫວ່າງ ອິດສະລາ ແອນ ແລະ ປາແລສຕິນທີ່ແກ່ຍາວມານັ້ນ ຈະບໍ່ສາມາດແກ້ຕົກໄດ້ ຖ້າບໍ່ມີການປະຕິບັດ ຢ່າງເປັນ ຮູບປະທໍາ. ບັນດາຍັດຕິຂອງສະພາຄວາມຫມັ້ນຄົງ ສປຊ ກ່ຽວກັບການ ສ້າງສອງລັດ ປາແລສຕິນ ແລະ ອິດສະລາແອນ ທີ່ດໍາລົງຢູ່ຄຽງຂ້າງກັນຢ່າງສັນຕິ. ສປປລາວ ຂໍຢໍ້າຄືນ ການສະຫນັບສະຫນູນ ລັດປາແລສຕິນ ໃຫ້ເປັນສະມາຊິກ ຂອງອົງການສະຫະປະຊາຊາດ ຢ່າງສົມບູນ.   ບັນຫາການຂວໍ້າບາດດ້ານເສດຖະ ກິດ, ການເງິນ ແລະ ການຄ້າ ຕໍ່ສາທາລະນະລັດກູບາ ເຊິ່ງເປັນປະເທດສະມາຊິກທີ່ຫ້າວຫັນຂອງອົງການ ສປຊ, ອັນໄດ້ນຳຜົນເສຍຫາຍຢ່າງໃຫຍ່ ຫລວງ ຕໍ່ປະຊາ ຊົນປະເທດນີ້ ຕ້ອງໄດ້ຢຸດຕິໂດຍໄວ.

ທ່ານ ປະທານ,

ປະເທດກຳລັງພັດທະນາທີ່ບໍ່ມີຊາຍແດນຕິດທະເລ ແມ່ນໜຶ່ງໃນກຸ່ມປະເທດ ທີ່ອ່ອນໄຫວ ທີ່ສຸດ ໃນບັນດາ ສະມາຊິກຂອງອົງການສະຫະປະຊາຊາດ ຍ້ອນທີ່ຕັ້ງທາງພູມສາດ ຂອງຕົນ. ສິ່ງທ້າທາຍພິເສດ ແລະ ອຸປະສັກອັນໃຫຍ່ຫຼວງຕໍ່ການພັດທະນາຂອງເຂົາເຈົ້າແມ່ນ ເກີດຂຶ້ນ ຍ້ອນຄວາມຫ່າງໄກຈາກຕະຫລາດໂລກ ແລະ ຄ່າຂົນສົ່ງຜ່ານແດນ ທີ່ມີມູນຄ່າສູງ, ເຊິ່ງສິ່ງ ເຫລົ່ານີ້ ໄດ້ເປັນອຸປະສັກ ໃຫ້ແກ່ການພັດທະນາແບບຢືນຍົງ ຂອງປະເທດເຫຼົ່ານີ້. ແຕ່ລະປີ ປະເທດ ກຳລັງພັດທະນາທີ່ບໍ່ມີຊາຍແດນຕິດທະເລ ຕ້ອງໄດ້ ໃຊ້ງົບປະມານຢ່າງມະຫາສານ ໃນການປັບປຸງລະບົບການຂົນສົ່ງ ແລະ ຂົນສົ່ງຜ່ານ ແດນຂອງຕົນເພື່ອຮັບປະກັນ ໃຫ້ແກ່ການ ສົ່ງອອກຂອງຕົນ ອັນເປັນແຫລ່ງລາຍຮັບ ອັນສຳຄັນ ຂອງຊາດ. ບັນຫາດັ່ງກ່າວ ຍິ່ງນັບມື້ນັບ ຮ້າຍແຮງໃນເມື່ອປະເທດເຫລົ່ານີ້ ໄດ້ຮັບຜົນກະທົບໂດຍກົງຈາກວິກິດການ ຕ່າງໆ ບໍ່ວ່າດ້ານ ການເງິນ, ດ້ານສັງຄົມ, ໄພພິບັດທາງທຳມະຊາດ, ການປ່ຽນແປງດິນຟ້າ ອາກາດ ແລະ ອື່ນໆ. ຍິ່ງໄປ ກວ່ານັ້ນ, 50% ຂອງກຸ່ມປະເທດເຫລົ່ານີ້ແມ່ນປະເທດດ້ອຍ ພັດທະນາ. ສະນັ້ນ, ຂ້າພະເຈົ້າ ຈຶ່ງຮຽກຮ້ອງມາຍັງ ວົງຄະນາຍາດສາກົນ ຈົ່ງໃຫ້ຄວາມສຳຄັນ ແລະ ເອົາໃຈໃສ່ຊ່ວຍເຫລືອປະເທດກຳລັງພັດທະນາ ທີ່ບໍ່ມີຊາຍແດນຕິດທະເລ ດ້ວຍການ ສຸມໃສ່ຈັດຕັ້ງປະຕິບັດແຜນດຳເນີນງານ ອານມາຕີ ກໍ່ຄືການເຂົ້າຮ່ວມຢ່າງຕັ້ງໜ້າ ໃນການທົບທວນ 10 ປີ ແຫ່ງການຈັດຕັ້ງ ປະຕິບັດແຜນດໍາເນີນງານ, ເຊິ່ງຈະໄດ້ຈັດຂຶ້ນ ໃນປີ 2014 ຈະມາເຖິງນີ້.

ທ່ານ ປະທານ,

ສປປ ລາວ ຢືນຢັນອີກເທື່ອໜຶ່ງເຖິງເຈດຕະນາລົມອັນແຮງກ້າ ແລະ  ຄວາມຫມາຍ ຫມັ້ນອັນໜັກແໜ້ນຂອງຕົນ ທີ່ຈະສືບຕໍ່ຮ່ວມມືຢ່າງເຕັມສ່ວນກັບປະຊາຄົມໂລກ ໃນການສ້າງ ໂລກ ທີ່ມີຄວາມສະຫງົບ, ມີສັນຕິພາບ, ເປັນທຳ ແລະ ມີປະຊາທິປະໄຕກວ່າເກົ່າ, ບົນພື້ນຖານ ແຫ່ງການຮ່ວມມືກັນຂອງທຸກປະເທດ ເພື່ອສາມາດຜ່ານຜ່າກັບສິ່ງທ້າທາຍ ຕ່າງໆ ທີ່ພວກເຮົາ ກຳລັງປະເຊີນຫນ້າຮ່ວມກັນ. ຂ້າພະເຈົ້າເຊື່ອຫມັ້ນວ່າ ມີແຕ່ການດຳ ເນີນການຮ່ວມກັນດ້ວຍ ມານະຈິດທີ່ເຂັ້ມແຂງເທົ່ານັ້ນ ພວກເຮົາຈຶ່ງຈະສາມາດບັນລຸເປົ້າ ຫມາຍດ້ານການພັດທະນາ ທັງ ໃນສະເພາະຫນ້າ ແລະ ຍາວນານ, ສ້າງໃຫ້ໂລກມີແຕ່ ຄວາມສະຫງົບ, ມີສັນຕິພາບ ແລະ ຄວາມຈະເລີນວັດທະນາຖາວອນຕໍ່ໄປໄດ້.  (ຂອບໃຈ)

 

Touktick Mangvanthana

class 4/2 noon, FNEM 0203/09

Phonepaserth

A topnotch WordPress.com site

ທ. ສີປະເສີດ ເຮືອງວິໄລ

Department of commerce, Class 4/2 Noon, FNEM 1172/09

The WordPress.com Blog

The latest news on WordPress.com and the WordPress community.